“Ухаалаг засаг-2” төслийн оролцогч талууд өнгөрсөн долоо хоногийн турш зөвлөлдөх уулзалт, нэгдсэн уулзалт хийж, хамтран ажиллалаа.

Монгол Улсын Засгийн газраас Дэлхийн банкны санхүүжилтээр хэрэгжүүлж байгаа “Ухаалаг засаг-2” төслийн хэрэгжилтэд дэмжлэг үзүүлэх зорилгоор Дэлхийн банкны албаны хүмүүс 2024 оны 2-р сарын 19–23-ныөдрүүдэд Улаанбаатар хотноо ажиллаж, төслийн оролцогч талуудтай уулзалт хийж, төслийн хүрээнд хийгдэж байгаа төсөл, арга хэмжээний явцыг эрчимжүүлэх,  цаашдын төлөвлөгөөний алхмуудын талаар хэлэлцлээ.

Албан томилолтын үеэр Дэлхийн банкны цахим хөгжлийн ахлах мэргэжилтэн, “Ухаалаг засаг-2” төслийн багийн дэд удирдагч Женнифер Гуй тэргүүтэй төлөөлөгчид, Цахим хөгжил, харилцаа холбооны яамны Төрийн нарийн бичгийн дарга, Төслийн удирдах хорооны дарга Б.Батцэцэг; Цахим хөгжлийн бодлогын хэрэгжилтийг зохицуулах газрын дарга, Төслийн захирал Б.Билэгдэмбэрэл; Засгийн газрын хэрэг эрхлэх газрын Төрийн захиргааны удирдлагын газрын дарга Д.Саруул; Эдийн засаг, хөгжлийн яамны Инновацын бодлогын газрын дарга Т.Золзаяа; Сангийн яамны Төрийн худалдан авах ажиллагааны газрын дарга Ц.Батзул; Байгаль орчин, аялал жуулчлалын яамны Уур амьсгалын өөрчлөлт, бодлого төлөвлөлтийн газрын дарга Ш.Цэрэндулам; Авлигатай тэмцэх газрын Хяналт шинжилгээ, дүн шинжилгээний хэлтсийн мэдүүлгийн бүрдүүлэлт, шинжилгээний албаны дарга, ахлах комиссар Б.Баярсайхан; Улсын бүртгэлийн ерөнхий газрын Тамгын газрын дарга Г.Цолмон нартай уулзсан юм.