Монгол Улсын интернет харилцах холболтын техник хангамжийг Layer 3-аас Layer 2 болгон шинэчлэв. Ингэснээр интернетийн үйлчилгээ үзүүлэгч байгууллагууд болон нийт хэрэглэгчид Монгол Улс дотроо хурдны хязгаарлалтгүйгээр дотоодын цахим хуудас, цахим систем, өгөгдөл солилцох, мэдээлэл солилцох боломжийг бүрдүүлэх төхөөрөмжийн хүчин чадлыг 3 дахин нэмэгдүүлж байна.

Үндэсний Дата төв болон Нөөц дата төвийн тоног төхөөрөмжийг шинэчлэх, хүчин чадлыг өргөтгөж байна. Үндэсний дата төвийн (ҮДТ) хүчин чадлыг 30%-иар нэмэгдүүлж, 2027 он хүртэлх нөөц хэрэгцээг хангах боломжтой болохын сацуу үйлчилгээ үзүүлж буй мэдээллийн системүүдийг найдвартай, бүрэн ажиллуулах бөгөөд онцгой нөхцөл байдалд нийт нөөцийн 50%-ийг Нөөц төвд хадгалж, хэвийн үйл ажиллагааг шилжүүлэн үргэлжлүүлэх техникийн чадамжтай болж байна. Мөн одоогийн нөөц цахилгаан хангамжийг дизель генератороор шинэчилж, эрчим хүчний хүчин чадлыг 60%-иар нэмэгдүүлнэ. Энэ шинэчлэл нь өндөр ба нам хүчдэлийн цахилгаан хангамж, хөргөлтийн систем болон бусад дэд тоног төхөөрөмжийн найдвартай ажиллагааг хангаж, тоног төхөөрөмжийн хяналт, ашиглалтыг сайжруулах нөхцөлийг бүрдүүлэх юм.

Төрийн байгууллагуудын цахим шуудангийн эрхийг сунгав. Өнөөдрийн байдлаар 710 байгууллагын 970 домэйнд 61,706 хэрэглэгч өдөрт дунджаар 30,000 имэйл хүлээн авч, 100,000 имэйл илгээж байна. “Төрийн мэдээллийн ил тод байдлын тухай” хуулийн 30.2-т зааснаар төрийн байгууллага, албан тушаалтан нь албан и-мэйл болон холбогдох дэмжих системийг ашиглах үүрэгтэй тул уг системийг үргэлжүүлэн ашиглах эрхийг төслийн хүрээнд сунгав.

Үүлэн тооцооллын үйлчилгээг ашиглах судалгааг хийж гүйцэтгэж байна. Монгол Улсын төрийн мэдээллийн санд дэд бүтэц хоцрогдсон, хадгалах багтаамж хязгаарлагдмал, гамшгаас хамгаалах механизм хангалтгүй зэрэг сорилтууд тулгарч байгаа тул үүлэн систем рүү шилжих нь мэдээллийн хүртээмж, засгийн газрын агентлаг, газар хоорондын хамтын ажиллагаатай холбоотой асуудлуудыг шийдэх юм. Гэсэн хэдий ч энэхүү шилжилтийг хийхэд арга зүй, мэдээллийн бүрэн эрхт байдлын асуудал, кибер аюулгүй байдлын болзошгүй эрсдэл болон сургалт, дэд бүтцэд ихээхэн хэмжээний анхны хөрөнгө оруулалт шаардлагатай болох учир үүлэн технологи руу амжилттай шилжихэд үр ашиг, эрсдэл, хэрэгжүүлэх стратеги зэргийг үнэлэхийн тулд нарийн үнэлгээ хийгдэж байна.

Үндэсний Дата Төв УТҮГ нь Монгол Улсад цахим засаглалыг хөгжүүлэх зорилго бүхий Цахим монгол, Бүртгэл мэдээллийн нэгдсэн тогтолцоог бий болгох, Мэдээллийн аюулгүй байдлыг хангах үндэсний хөтөлбөрүүдийг хэрэгжүүлэх ажлын хүрээнд Монгол Улсын Засгийн Газрын 2009 оны 183 дугаар тогтоолоор байгуулагдсан бөгөөд Монгол Улсын үндэсний цахим мэдээллийн хадгалалт, хамгаалалт, боловсруулалтын үйлчилгээ эрхлэх үндсэн үүрэг бүхий улсын төсөвт үйлдвэрийн газар юм.

Цахим хөгжил, инновац, харилцаа холбооны яам-с Дэлхийн банкны Олон улсын хөгжлийн ассоциацийн санхүүжилтээр хэрэгжүүлж буй “Ухаалаг Засаг-2” төсөл нь Монгол Улсын дижитал засаглалыг дараагийн үе шатад хүргэн өргөжүүлэх, дижитал эдийн засгийг хөгжүүлэх, иргэд, аж ахуйн нэгжид үзүүлэх төрийн цахим үйлчилгээний үр ашгийг дээшлүүлэх, иргэдийн дижитал ур чадвар, дижитал технологи бүхий ажлын байрыг нэмэгдүүлэх зорилгоор хэрэгжиж байна.